ماماندىققا ادالدىق 

ارقان كەرىپ ايەل بوساندىرۋ ءداس­تۇرى كەلمەسكە كەتتى دەسەك تە, تاۋبە, ەتەگىنەن بالا ساۋلاعان اياۋ­لى انالار بار ارامىزدا. سولاي بولا تۇر­عانىمەن, اجالمەن ارپالى­سىپ, «تار قۇرساعىن كەڭىتكەن, تاس ەمشەگىن جىبىتكەن» انا مەن نارەستەنىڭ ءومىرىن امان الىپ قالۋ – وڭاي ءىس ەمەس. بۇل جاۋاپتى مىندەت, ەڭ الدىمەن, اكۋشەر-گينەكولوگ مامانىنا جۇكتەلەتىنى بەلگىلى. جاننا امىربەكوۆا بولسا, سول اسا جاۋاپتى قىزمەتتى وسىمەن ون جىلدىڭ كولەمىندە ابىرويمەن اتقارىپ كەلەدى.

شىبىن جانى شۇبەرەككە ءتۇيى­لىپ, تولعاعى قىسقان ايەل مەن ءسابي­­دىڭ جانىن ساقتاپ قالۋ قاشان دا قيىن. ال جاھاندى جايلاعان COVID-19 ىندەتى كەزىندە جاعداي ءتىپتى كۇردەلەنە تۇسكەنى ايتپاسا دا انىق. بۇل ماماننىڭ كاسىبي شەبەر­لىگى سىنالاتىن قيىن-قىستاۋ كەزەڭ دەسە دە بولادى.

– كوروناۆيرۋس ىندەتى قوعام­نىڭ قاي سالاسىنا بولسىن كەرى اسەرىن تيگىزگەنىن جاقسى بىلەمىز. اسىرەسە بوساناتىن جۇكتى ايەلدەر قاۋىمى ءۇشىن وڭاي بولعان جوق. اسقىنعان جاعدايلارمەن دە بەتپە-بەت كەلىپ جاتتىق. بۇل رەتتە ەلىمىزدىڭ دەن­ساۋ­لىق ساقتاۋ مينيسترلىگىنىڭ قاداعالاۋىمەن ارنايى ساراپشىلار توبى قۇرىلعان بولاتىن. بۇل توپ وسى ىندەتتى ەمدەۋ جولدارىنىڭ پروتوكولىن ازىرلەۋمەن اينالىستى. مەن – سول پروتوكولدى ازىرلەگەن اۆتورلاردىڭ ءبىرىمىن, – دەدى PhD دوكتورى.

بۇگىندە قاراعاندى قالاسىندا ەڭبەك ەتىپ جۇرگەن بىلىكتى مامان – انىعىندا قازىرگى تۇركىستان وبلىسىنا قاراستى ماقتاارال اۋدانى تابىستى اۋىلىنىڭ تۋماسى. 2003 جىلى جۇلدىزى جانىپ, ارمانى ورىندالىپ قاراعاندى مەديتسينا ۋنيۆەرسيتەتىنە وقۋعا قابىلدانادى. كەيىن وسى ءبىلىم ورداسىندا ماگيس­تراتۋرادا, دوكتورانتۋرادا وقىپ, شەبەرلىگىن شىڭدادى. ءبىر ادامعا جەتەرلىك ءبىلىمى, وقىعان-توقىعانى بولا تۇرسا دا انا مەن بالانىڭ اماندىعىن ويلاعان جاس مامان مۇنىمەن دە شەكتەلىپ قالعان جوق. ەل اۋماعىنداعى عىلىمي ورتالىق­تاردا تاجىريبە جيناقتاپ, ءدارىس تىڭ­دادى. ءتىپتى ەل اۋماعى بىلاي تۇرسىن, فرانتسيا, مالايزيا, رەسەي, نيدەرلاندى, تۇركيا مەملەكەت­تەرىنە ارنايى ساپارلاپ, ويىن ورىس­تەتتى, بىلىكتىلىگىن جەتىلدىردى.

قازىرگى تاڭدا ءوزى ءبىلىم العان ۋنيۆەرسيتەت قابىرعاسىندا اكۋشەرلىك, گينەكولوگيا جانە پەريناتولوگيا كافەدراسىنىڭ مەڭگەرۋشىسى. شاكىرت تاربيەلەپ, جيعان تاجىريبەسىمەن ءبولىسىپ, بولاشاق مامانداردى وقىتىپ جاتقان جايى بار. بۇعان قوسا قاراعاندى قالاسىنداعى №2 پەريناتالدى ورتالىعىندا اكۋشەر-گينەكولوگ مامان رەتىندە ەڭبەك ەتىپ كەلەدى. سانالى ۇرپاققا ساپالى ءبىلىم بەرىپ قانا قوي­ماي, جۇكتى ايەلدەردىڭ دە العىسى­نا بولەنىپ ءجۇر. ماسەلەن, بىلتىر ساۋىردە جانبوتا (ەسىمى وزگەرتىل­دى) ەسىمدى ازاماتشا جولداسىمەن بىرگە قابىلداۋىنا جازىلادى. اتالعان ايەل 5 جىل كولەمىندە بەدەۋلىك دياگنوزىمەن ەسەپتە تۇرىپتى. بارماعان جەرى, باسپاعان تاۋى جوق. ءارتۇرلى جەردە ەم قابىلداعان كورىنەدى. بىراق سوعان ساي ناتيجە بولماعان.

– بۇل ىستە, ەڭ باستىسى – دۇرىس دياگ­نوز قويۋ. پاتسيەنتتىڭ حال-جاع­دايىن زەرتتەپ-زەردەلەي كەلە انا­لىق بەزدەرى دۇرىس جۇمىس ىستە­مەيتىنىن انىقتاپ, ءوز قولىممەن وپەراتسيا جاسادىم. كەيىن ارادا ازدى-كوپ­تى ۋاقىت وتكەندە سول وتا ءوز ناتي­جەسىن بەردى. ايەلدىڭ بويىنا تابيعي جولمەن, وزدىگىنەن بالا ءبىتتى. ءبىر قىزىعى, ءبىر ەمەس, بىردەن ەگىز بالاعا جۇكتى بولدى. بيىل قاڭ­تاردا 34 اپتادا بالانىڭ سۋى ەرتە كەتىپ, تابيعي جولمەن بوساندىرىپ الدىم. ومىرگە ءبىر ۇل, ءبىر قىز كەل­دى. سابيلەر ۋاقىتىنان بۇرىن دۇ­نيەگە كەلگەن سوڭ ءبىر ايعا جۋىق ۋا­قىت باقىلاۋىمىزدا بولىپ, كەيىن امان-ەسەن ۇيىنە شىعارىپ سالدىق. ال­عى­سىن جاۋدىرعان اتا-انانىڭ, تۋعان-تۋىستارىنىڭ قۋانىشىندا شەك جوق, – دەدى ج.امىربەكوۆا.

انا – تىرشىلىكتىڭ كوزى, ءومىردىڭ ءوزى. نارەستەنىڭ كىندىگى كەسىلگەن ساتتە جاڭا ءومىردىڭ تۇندىگى تۇرىلەدى. ال سول كىندىكتى كەسىپ, تۇندىكتى ءتۇرىپ جۇرگەن جاننا امىربەكوۆا سىن­دى ىسىنە ادال, انتىنا بەرىك مامان­دار. ەندەشە, وتانداستارىمىز وزگە­دەن بۇرىن وسىنداي ادامداردى ۇلگى تۇتىپ, مەديتسينا سالاسى مامان­دارىنىڭ ەڭبەگىن باعالاي بىلۋگە ءتيىس. بۇگىنگى قوعام تالابى دا – وسى.